AMEA-nın “Elm və həyat” elmi-populyar jurnalının 2025-ci ilin üçüncü sayı işıq üzü görüb. Nəşrin bu sayında Milli Azərbaycan Tarixi Muzeyinin əməkdaşlarının məqalələri dərc olunub.
Muzeyin İnnovasiyalar və təhsil proqramları şöbəsinin müdiri Fəridə Şəmsinin Yusif Məmmədəliyevin 120 illik yubileyinə həsr olunmuş “Yusif Məmmədəliyevin irsi muzeylərdə” (səh. 40–42) adlı məqaləsində akademikin elmi fəaliyyəti və onun Azərbaycan elminin inkişafındakı rolu təhlil olunub. Müəllif məqalədə alim haqqında arxiv materialları, elmi mənbələr və muzey eksponatlarına istinad edərək onun elmi irsinin bu gün muzeylərdə necə təqdim olunduğunu diqqətə çatdırır.
Sözügedən jurnalda həmin şöbənin baş mütəxəssisi Nigar Əhmədlinin Üzeyir Hacıbəylinin 140 illik yubileyinə həsr olunmuş “Hacıbəyli Peterburqda” (rus dilində) (səh. 33–35) adlı məqaləsi də yer alıb. Məqalədə dahi bəstəkar, Azərbaycan peşəkar musiqi sənətinin və milli operasının banisi Üzeyir Hacıbəylinin Sankt-Peterburqda keçirdiyi illər, təhsil mühiti və yaradıcılığının formalaşmasında bu dövrün rolu ətraflı şəkildə işıqlandırılır. Məqalədə Üzeyir Hacıbəylinin Avropa musiqi məktəbləri ilə tanışlığı, onun Şərq və Qərb musiqi ənənələrini sintez edərək milli musiqiyə gətirdiyi yeniliklər elmi-populyar dildə təqdim olunur.
