Milli Azərbaycan Tarixi Muzeyində Zəfər Gününə həsr olunmuş interaktiv dərs keçirilib. Dərs İnnovasiyalar və təhsil proqramları şöbəsinin baş mütəxəssisi Ülviyyə Nəftəliyeva tərəfindən Bakı Modern Tehsil Kompleksinin şagirdləri üçün təşkil olunub.
Şagirdlərə 44 günlük Vətən Müharibəsi, Azərbaycanın ərazi bütövlüyü uğrunda aparılan döyüşlər barədə ətraflı məlumat verilib.
Sonra Zəfər Gününə həsr olunmuş “kvest” təşkil edilib. Oyun formasında keçirilən bu mərhələdə şagirdlər sualları cavablandıraraq, qələbə mövzusuna aid biliklərini nümayiş etdiriblər.
Sonda “Xarıbülbül” ustad dərsində şagirdlər Xarıbülbül formasında olan gips fiqurları rəngləyiblər.
Keçirilən interaktiv dərs Zəfər Gününün mənəvi əhəmiyyətinin uşaqlara aşılanması, vətənpərvərlik duyğularının möhkəmləndirilməsi və qəhrəmanlıq ruhunun yaşadılması baxımından xüsusi əhəmiyyət kəsb edib.
