Milli Azərbaycan Tarixi Muzeyinin Etnoqrafiya fondunun zəngin kolleksiyasında XVII–XX əsrlərə aid, müxtəlif ölkələrdə istehsal olunmuş çini nümunələr qorunur. Kolleksiya Çin, Yaponiya, İngiltərə, Fransa, Polşa və digər ölkələrin çini məmulatlarını əhatə edir.

Bu nümunələr arasında xüsusilə diqqət çəkən eksponatlardan biri Çin dövlətinə aid, incə işləmə ənənələrini əks etdirən XIX əsr çini güldanıdır. Eksponatın üzərində Çin və dünya ədəbiyyatının ən məşhur əsərlərindən biri olan, Tsao Syuetsin tərəfindən qələmə alınmış “Qırmızı otaqda yuxu” romanından səhnələr təsvir edilib.

Forması ilə də diqqət çəkən güldanın oturacağı dar, gövdəyə doğru genişlənmiş, boğazı isə gövdəsinə nisbətən ensiz quruluşa malikdir. Dörd medalyonda nəbati və zoomorf motivlər, altı medalyonda isə  sözügedən roman əsasında hazırlanmış süjetlər əks olunub.

XIX əsr çini sənətinin zərifliyi və bədii xüsusiyyətlərini özündə birləşdirən bu güldan muzeyin dəyərli eksponatları sırasında xüsusi yer tutur.