Milli Azərbaycan Tarixi Muzeyinin Etnoqrafiya fondunda müxtəlif dini məzmunlu məişət əşyaları – quranqabılar, möhürqabılar, namazlıqlar qorunur. Bu əşyalar müxtəlif parçalardan tikilmiş, zərif tikmə nümunələri ilə bəzədilmişdir.

Təqdim olunan quranqabı XIX əsrin sonu – XX əsrin əvvəllərinə aid olub, Şuşa şəhərində istifadə edilib. Ənənəvi sənətkarlıq nümunəsi olan quranqabı tirmə parça üzərində şahpəsənd, zərbafta, qaragöz bafta kimi bəzəklərlə hazırlanmışdır. Həm qoruyucu, həm də estetik məqsəd daşıyan belə qovluqlar dini irsin və ənənəvi zövqün təcəssümüdür.