Azərbaycan qadınlarının gündəlik və mərasim geyimlərində zinət əşyaları hər zaman  mühüm yer tutmuşdur. Qadınlar sırğa, boyunbağı, bilərzik və digər zinət əşyalarından həm estetik zövqün, həm də sosial statusun göstəricisi kimi istifadə edirdilər. Milli Azərbaycan Tarixi Muzeyinin Xüsusi fondunda qorunan, təqdim olunan sırğa Azərbaycan zərgərlik sənətinin şəbəkə texnikası ilə hazırlanmış nümunələrindən biridir.

Sözügedən sırğanın yuxarı hissəsində qırmızı qaşlı ay-ulduz, alt hissəsində çətir formasında asılmış altı ləçəkli gül motivi və şar formalı dekorativ elementlər əks olunub. Sırğanın detalları xırda mirvarili asmalarla bəzədilib.

Bu zinət nümunəsi dövrün zərif zövqünü və ustaların yüksək sənətkarlıq səviyyəsini əks etdirir.