13 yanvar 2026-cı il tarixində Türk Mədəniyyəti və İrsi Fondunun prezidenti xanım Aktotı Raimkulova Milli Azərbaycan Tarixi Muzeyinin Muzey eksponatlarının qorunması və qeydiyyatı üzrə direktor müavini- baş mühafiz, t.ü.f.d, dosent Məhfuzə Zeynalova və muzeyin Xüsusi fondunun müdiri, t.ü.f.d., dosent Afət Rüstəmbəyova ilə görüş keçirib. Görüş zamanı tərəflər türk dünyasının ortaq mədəni irsinin qorunması, tədqiqi və beynəlxalq səviyyədə tanıdılması istiqamətində əməkdaşlıq imkanları, xüsusilə muzeylərarası əlaqələrin gücləndirilməsi, birgə sərgilərin təşkili, elmi-tədqiqat layihələrinin həyata keçirilməsi, nəşr proqramları, maarifləndirici tədbirlər və mütəxəssis mübadiləsi məsələlərini müzakirə ediblər. Hər iki tərəf arasında Anlaşma Memorandumunun imzalanmasının vacibliyi vurğulanıb. Memorandumun gələcək əməkdaşlıq üçün hüquqi və institusional baza yaradacağı, tərəflərin uzunmüddətli tərəfdaşlığını möhkəmləndirəcəyi qeyd olunub. Razılığa əsasən, Türk Mədəniyyəti və İrsi Fondu tərəfindən Anlaşma Memorandumunun layihəsi hazırlanaraq Milli Azərbaycan Tarix Muzeyinə təqdim ediləcək. Sənədin qarşılıqlı razılaşdırılmasından sonra rəsmi imzalanma mərasiminin təşkili planlaşdırılır. Görüş iştirakçıları bu əməkdaşlığın türk xalqlarının ortaq tarixinin və mədəni irsinin beynəlxalq miqyasda daha geniş təbliğinə mühüm töhfə verəcəyini bildiriblər.