Davud Qurbanov 1996-cı il fevralın 15-də Bakı şəhərində anadan olub. O, 2002–2013-cü illərdə Biləcəri qəsəbəsi R. Pirnəzərov adına 299 saylı məktəb-liseyində təhsil alıb. 2013–2017-ci illərdə Azərbaycan Dövlət Neft və Sənaye Universitetinin (ADNSU) “İstehsalat proseslərinin avtomatlaşdırılması” fakültəsində bakalavr pilləsi üzrə təhsil alıb, 2017–2019-cu illərdə isə həmin fakültənin magistratura pilləsində təhsilini davam etdirib.

Davud Qurbanov 2020-ci il sentyabrın 27-də Azərbaycan Silahlı Qüvvələri tərəfindən Ermənistanın işğalı altında olan ərazilərin azad edilməsi uğrunda başlanan Vətən Müharibəsi zamanı döyüşlərdə iştirak edib, 2020-ci il oktyabrın 3-də Suqovuşan uğrunda gedən döyüşlər zamanı şəhid olub. Azərbaycan Prezidenti İlham Əliyevin 29 dekabr 2020-ci il tarixli Sərəncamına əsasən Davud Qurbanov ölümündən sonra "Suqovuşanın azad olunmasına görə" medalı ilə təltif edilib.

Qeyd edək ki, Muzeyin “Böyük Zəfərin Qəhrəmanları” adlı yeni kataloqunda şəhid Davud Qurbanovun həyat yolu, döyüş fəaliyyəti və əziz xatirəsi ilə bağlı məlumatlar yer alıb.