Milli Azərbaycan Tarixi Muzeyinin ekspozisiyasının yenilənməsi istiqamətində hazırlanan yeni tematik plan muzey əməkdaşlarının iştirakı ilə keçirilən iclasda müzakirə olunub. Müzakirə zamanı ekspozisiyanın məzmununun müasir yanaşmalar əsasında təkmilləşdirilməsi, mövzular üzrə strukturlaşdırılması və ziyarətçilər üçün daha cəlbedici təqdimat formalarının tətbiqi məsələləri ətrafında fikir mübadiləsi aparılıb. İclas çərçivəsində ekspozisiyanın elmi konsepsiyasının gücləndirilməsi, rəqəmsal həllərin tətbiqi, interaktiv elementlərin artırılması və fond materiallarının daha effektiv nümayişi ilə bağlı təkliflər səsləndirilib. Eyni zamanda, müxtəlif yaş qrupları üçün maarifləndirici tədbirlərin keçirilməsini genişləndirilməsi və bu istiqamətlərdə beynəlxalq təcrübənin nəzərə alınması vacib məqam kimi vurğulanıb.

 

Müzakirələrin yekununda səsləndirilən rəy və təkliflərin ümumiləşdirilərək yeni tematik planın təkmilləşdirilməsi istiqamətində işlərin davam etdirilməsi qərara alınıb.