Xocalı soyqırımının 34-cü ildönümü ilə əlaqədar Milli Azərbaycan Tarixi Muzeyinin İnnovasiyalar və təhsil proqramları şöbəsinin baş mütəxəssisi Qənirə Qafarlı tərəfindən Bakı şəhəri 153 nömrəli tam orta məktəbdə muzeydənkənar interaktiv dərs keçirilib.

Dərs zamanı Xocalının qədim tarixi və zəngin mədəni irsi haqqında məlumat verilib, 1992-ci il fevralın 25-dən 26-na keçən gecə törədilmiş Xocalı soyqırımının faciəvi nəticələri diqqətə çatdırılıb. Vurğulanıb ki, bu hadisə təkcə Azərbaycan xalqına deyil, bütün bəşəriyyətə qarşı ağır cinayət kimi qiymətləndirilir və hər il 26 fevral ölkəmizdə ehtiramla yad olunur.

Şagirdlərə muzeyin Birinci Qarabağ müharibəsi və Xocalı faciəsinə həsr olunmuş bölməsi, eləcə də 44 günlük Vətən müharibəsində qazanılmış Qələbə barədə məlumat verilib.

Sonda interaktiv müzakirə aparılıb, şagirdlərin sualları cavablandırılıb və tarixi yaddaşın qorunmasının əhəmiyyəti bir daha vurğulanıb.