AMEA-nın akademik Z.M.Bünyadov adına Şərqşünaslıq İnstitutu, AMEA Rəyasət Heyətinin Elmi İrs şöbəsi, Varşava Universitetinin Asiya və Afrika Mədəniyyəti fakültəsi və həmin universitetin Azərbaycan Araşdırmaları Mərkəzinin birgə təşkilatçılığı ilə AMEA Mərkəzi Elmi Kitabxanasında “Sadiq bəy Ağabəyzadə – XX əsr şərqşünaslıq elminin görkəmli nümayəndəsi kimi” adlı beynəlxalq elmi konfrans keçirilib. Muzeyin Azərbaycan tarixinin elmi tədqiqi və təqdimi şöbəsinin əməkdaşı, t.ü.f.d., dos. Əli Fərhadov konfransda “XVI əsrdə dinlər arası dialoq və dini vəhdət təcrübəsi: 'Din-i İlahi'” mövzusunda məruzə ilə çıxış edib. Məruzədə XVI əsrin Hindistanında Əkbər şah Baburlu zamanında dini-fəlsəfi mənzərə, müxtəlif inanclar və mədəniyyətlər arası dialoq cəhdləri və şahın "Din-i İlahi" konsepsiyasının mahiyyəti elmi faktlarla təhlil olunub. Məruzədə Əkbər şahın dini fanatizmə, azyaşlıların zorla evləndirilməsinə, dul hindu qadınların yandırılmasına, qeyri-müsəlmanlara təzyiqlərə qarşı mücadiləsindən danışılıb. Həmçinin, onun dinlər və məzhəblər arası ixtilaflara qarşı mübarizəsindən, mədəniyyətlər arası və dini vəhdət mövzusundakı çalışmalarından geniş bəhs olunub. Bu siyasətin günümüzdəki aktuallığı vurğulanıb.

Məruzə iştirakçılar tərəfindən maraqla qarşılanıb və mövzu ətrafında fikir mübadiləsi aparılıb.

Konfrans materiallarının nəşr olunması nəzərdə tutulub.