Litva Respublikasının Azərbaycandakı fövqəladə və səlahiyyətli səfiri Kestutis Vaşkeleviçus Milli Azərbaycan Tarixi Muzeyini ziyarət edib və təəssüratlarını özünün “Facebook” hesabında paylaşıb. Cənab Səfir qeyd edib ki, muzey Azərbaycanın görkəmli sahibkarı və xeyriyyəçisi Zeynalabdin Tağıyevin möhtəşəm keçmiş iqamətgahında yerləşir. O, paylaşımında Tağıyevin uzaqgörən sahibkar və xeyriyyəçi kimi irsinin xüsusilə diqqət çəkdiyini vurğulayıb və bunun fərdi təşəbbüsün bir ölkənin tarixinin və ictimai inkişafının formalaşmasında oynadığı rolu xatırlatdığını bildirib. Səfir bildirib ki, muzey qədim artefaktlardan başlayaraq XIX əsrin sonu-XX əsrin əvvəllərinə aid zərif interyer nümunələrinədək geniş ekspozisiya təqdim edir. Səfirin sözlərinə görə, bu zənginlik Azərbaycanın kimliyi, dözümlülüyü və mədəni irsi haqqında daha dolğun təsəvvür yaradır.