Milli Azərbaycan Tarixi Muzeyində 18 aprel- Beynəlxalq Abidələr və Tarixi Yerlər Günü münasibətilə Tofiq İsmayılov adına 6 saylı məktəb-liseyin şagirdləri üçün maarifləndirici interaktiv dərs və ustad dərsi təşkil olunub. Muzeyin İnnovasiyalar və təhsil proqramları şöbəsinin təşkilatçılığı ilə keçirilən dərs zamanı muzeyin yerləşdiyi Hacı Zeynalabdin Tağıyevin tarixi binası haqqında şagirdlərə ətraflı məlumat verilib, onun memarlıq xüsusiyyətləri və Bakı şəhərinin inkişafındakı rolu izah olunub. Tədbirin interaktiv hissəsində şagirdlər arasında “kvest” və “kviz” formatında bilik yarışı təşkil edilib. Bundan əlavə, iştirakçılar Qız qalası formasında gips fiqurlarını rəngləyərək yaradıcılıq bacarıqlarını nümayiş etdiriblər. Proqram çərçivəsində müxtəlif intellektual oyunlar da keçirilib, şagirdlər tarixi binaları vizual materiallar əsasında müəyyənləşdiriblər. Sonda isə onlar muzeyin ekspozisiyası ilə tanış olublar. Tədbirin əsas məqsədi şagirdlərin tarixi abidələr və memarlıq irsi barədə biliklərini artırmaq, onların qorunmasının əhəmiyyətini aşılamaq olub.