Milli Azərbaycan Tarixi Muzeyinin Etnoqrafiya elmi fond şöbəsinin əməkdaşı, t.ü.f.d., Fatma Qəniyeva Qars Qafqaz Universiteti və AMEA Şərqşünaslıq İnstitutunun təşkilatçılığı ilə Xəzər Universitetində keçirilən “I. Uluslararası Türk Dünyasında Kültür ve Değerlerin İzleri” (I Beynəlxalq “Türk dünyasında mədəniyyət və dəyərlərin izləri”) simpoziumunda “Azərbaycanda mədəni kimliyin qorunması qloballaşma kontekstində” adlı məruzə ilə çıxış edib. F.Qəniyeva məruzəsində Azərbaycan mədəni kimliyinin komponentləri və onların qorunması barədə məlumat verib. Eyni zamanda, gənc nəsil arasında mədəni maarifləndirmənin, mədəniyyətlərarası dialoqun və beynəlxalq mədəni layihələrin mədəni kimliyin davamlı inkişafına göstərdiyi təsirdən bəhs edib. Simpoziumda Azərbaycan, Türkiyə və Özbəkistandan olan tədqiqatçıların məruzələri dinlənilib, mövzu ətrafında geniş müzakirələr aparılıb.

Sonda məruzəçilərə sertifikatlar təqdim edilib. Konfrans materiallarının tezliklə dərc ediləcəyi bildirilib.