Milli Azərbaycan Tarixi Muzeyində görkəmli Azərbaycan şairi Səməd Vurğunun anadan olmasının 120 illiyinə həsr olunmuş tədbir keçirilib.

Tədbir muzeyin İnnovasiyalar və təhsil proqramları şöbəsinin baş mütəxəssisi Aynur Babayeva tərəfindən açılıb. O, iştirakçıları salamlayaraq, tədbirin əhəmiyyəti barədə məlumat verib. Qeyd olunub ki, Azərbaycan Respublikası Prezidentinin Səməd Vurğunun 120 illiyinin qeyd edilməsi haqqında Sərəncamına əsasən, 2026-cı il martın 21-də şairin yubileyi geniş şəkildə qeyd olunur. Həmçinin, muzey eksponatları və fond materialları əsasında şairin həyat və yaradıcılığı barədə geniş məlumat verilib, onun Azərbaycan ədəbiyyatındakı xüsusi mövqeyini vurğulayıb. 

Tədbir çərçivəsində ümummilli lider Heydər Əliyevin Səməd Vurğun haqqında çıxışını əks etdirən videoçarx nümayiş etdirilib. Eyni zamanda, iştirakçılar şairin öz səsi ilə səsləndirilmiş çıxışını dinləyiblər. 

Sonra Azərbaycan Yazıçılar Birliyinin və Dünya Yazıçılar Təşkilatının üzvü, “Gənc şairlər” uşaq ədəbi layihəsinin rəhbəri Lalə Həsənova çıxış edib. Tədbirin bədii hissəsində layihə iştirakçısı olan uşaqların çıxışları dinlənilib, Səməd Vurğunun yaradıcılığından nümunələr səsləndirilib.

Tədbirdə fəal iştirak edənlərə təşəkkürnamələr təqdim olunub və xatirə şəkilləri çəkilib.