12 may 2026-cı il tarixində Milli Azərbaycan Tarixi Muzeyində Azərbaycan Kooperasiya Universitetinin IV kurs tələbələri üçün seminar təşkil olunub.
Seminarda Muzeyin “Azərbaycan tarixinin elmi tədqiqi və təqdimi” şöbəsinin böyük elmi işçisi, tarix üzrə fəlsəfə doktoru, dosent Tural Şiriyev “Azərbaycan xalqının birgəyaşayış mədəniyyətində el köməyi adətlərinin yeri” mövzusunda məruzə ilə çıxış edərək tələbələrə ətraflı məlumat verib.
Məruzədə Azərbaycan xalqının birgəyaşayış mədəniyyətində el köməyi adətlərinin rolu tarixi-etnoqrafik baxımdan təhlil edilib. Bildirilib ki, tarix boyu bu adətlər insanların qarşılıqlı yardımlaşma, həmrəylik və birlik prinsipləri əsasında yaşamasını təmin edən əsas amillərdən biri olub.
Çıxış zamanı xüsusilə kənd mühitində formalaşan el köməyi adətlərinin cəmiyyətin sosial münasibətlərinin möhkəmlənməsində mühüm rol oynadığı, zamanla sosial institut səviyyəsinə qədər inkişaf edərək xalqın birgəyaşayış mədəniyyətinə güclü təsir göstərdiyi vurğulanıb.
Məruzə tələbələrin böyük marağına səbəb olub, seminar çərçivəsində mövzu ətrafında geniş müzakirələr aparılıb.
