Dünya Şəhərsalma Forumu–WUF (World Urban Forum) çərçivəsində Türkmənistan Prezidenti yanında Arxadağ şəhərinin Tikinti üzrə Dövlət Komitəsinin sədr müavini Nazar Joytyyev və Türkməninstanın Azərbaycandakı Səfirinin ikinci katibi Beqenç Kakacanov Milli Azərbaycan Tarixi Muzeyini ziyarət ediblər.

Qonaqları muzeyin direktoru, akademik Nailə Vəlixanlı qarşılayaraq, muzeyin yaranma tarixi, elmi fəaliyyəti və zəngin kolleksiyası barədə ətraflı məlumat verib. Qonaqlar muzeyin ekspozisiya zalları ilə tanış olaraq, Azərbaycanın qədim və zəngin tarixini əks etdirən eksponatlara böyük maraq göstərib. Ekspozisiyada nümayiş etdirilən arxeoloji tapıntılar, orta əsr şəhər mədəniyyətinə aid nümunələr, milli sənətkarlıq ənənələrini əks etdirən eksponatlar və dövlətçilik tariximizlə bağlı materiallar qonaqlarda xüsusi maraq doğurub. Görüş zamanı Azərbaycan və Türkmənistan xalqları arasında mövcud olan tarixi-mədəni bağlılıq və dostluq münasibətləri vurğulanıb. Bildirilib ki, ortaq türk kökləri, qədim İpək Yolu üzərində formalaşmış əlaqələr və Xəzəryanı regionunda əsrlərlə davam edən qarşılıqlı münasibətlər bu gün də iki ölkə arasında əməkdaşlığın möhkəm təməlini təşkil edir. Qeyd olunub ki, humanitar və mədəni əlaqələrin inkişafı Azərbaycan–Türkmənistan münasibətlərinin daha da dərinləşməsinə xidmət edir və bu cür səfərlər xalqlar arasında dostluq körpülərinin möhkəmlənməsinə mühüm töhfə verir.