Milli Azərbaycan Tarixi Muzeyinin Kitabxanasının Nadir kitablar fondunda XIX əsrin ikinci yarısında Bakı quberniyasına həsr olunmuş “Списки населенных месть Российской Империи. По Кавказскому краю. LXV. Бакинская Губерния” (“Qafqaz bölgəsində Rusiya İmperiyasının yaşayış məntəqələrinin siyahıları. LXV. Bakı quberniyası”) adlı nadir nəşr mühafizə olunur.

1870-ci ildə Tiflisdə Qafqaz canişinin Baş İdarəsi nəzdində fəaliyyət göstərən Qafqaz Statistika Komitəsi tərəfindən çap olunmuş kitabda Bakı quberniyası haqqında geniş məlumat təqdim edilir. Nəşrdə quberniyanın coğrafi mövqeyi, geoloji quruluşu və faydalı qazıntıları, hidroqrafik xüsusiyyətləri, iqlimi və təbii mühiti ətraflı şəkildə təsvir olunub.

Bundan əlavə, kitabda Bakı quberniyasının tarixi və etnoqrafik icmalı, əhalinin etnik və dini tərkibi haqqında məlumatlar yer alıb. Nəşrdə kənd təsərrüfatı, sənaye, rabitə, ticarət, gəmiçilik, səhiyyə və təhsil sistemləri ilə bağlı da mühüm statistik və tarixi məlumatlar öz əksini tapıb.

Tarixi mənbə kimi böyük əhəmiyyət daşıyan bu nəşr XIX əsr Azərbaycanının sosial-iqtisadi və mədəni həyatının öyrənilməsi baxımından mühüm elmi mənbələrdən biri hesab olunur.