Milli Azərbaycan Tarixi Muzeyində 1 İyun – Uşaqların Beynəlxalq Müdafiəsi Gününə həsr olunmuş “Tarixin uşaq izləri” adlı sərginin açılış mərasimi keçirilib.

Tədbirdə çıxış edən muzeyin direktoru, akademik Nailə Vəlixanlı sərginin uşaqlarda tarixə və mədəni irsə marağın artırılmasına xidmət etdiyini qeyd etmiş, 1 İyun – Uşaqların Beynəlxalq Müdafiəsi Günü münasibətilə bütün uşaqlara ən xoş arzularını çatdıraraq onlara sağlam, xoşbəxt və uğurlu gələcək arzulamışdır.

Daha sonra Azərbaycan Fotoqrafları Birliyinin üzvü Mirnaib Həsənoğlu çıxış edərək layihənin əhəmiyyətindən danışıb, onun ərsəyə gəlməsində əməyi olan əməkdaşlara və muzey rəhbərliyinə təşəkkürünü bildirib.

Açılışda mədəniyyət və incəsənət nümayəndələri, fotoqraflar, sənətsevərlər və digər qonaqlar iştirak ediblər. Sərgidə muzeyin kolleksiyasından seçilmiş arxeoloji tapıntılar, qədim oyuncaqlar, milli geyimlər, məişət əşyaları, fotoşəkillər və nəşrlər nümayiş olunub.

Sərgi Milli Azərbaycan Tarixi Muzeyi və Azərbaycan Fotoqrafları Birliyinin birgə təşkilatçılığı ilə həyata keçirilmişdir.

Tariximizin və mədəni irsimizin uşaqlıq dünyasında qoyduğu izləri kəşf etmək, keçmişə uşaqların gözü ilə nəzər salmaq istəyən hər kəs “Tarixin uşaq izləri” sərgisi ilə tanış olmaq üçün Milli Azərbaycan Tarixi Muzeyinə dəvət olunur.