İyunun 17-də Milli Azərbaycan Tarixi Muzeyində “Yusuf Məmmədəliyev: Elm. İrs. İnnovasiyalar” konfransının iştirakçılarına və təşkilatçılarına diplomların təqdimetmə mərasimi keçirilmişdir. Əvvəlcə 2025-ci ilin dekabrında Bakıda keçirilmiş “Yusuf Məmmədəliyev: Elm. İrs. İnnovasiyalar” beynəlxalq konfransına həsr edilmiş videoçarx nümayiş olundu.

Daha sonra çıxış edən Akademik Yusuf Məmmədəliyev Fondunun icraçı direktoru Ramil Abbəkirov beynəlxalq konfransın əsas nəticələrindən, dünya şöhrətli Azərbaycan aliminin elmi irsinin öyrənilməsi və populyarlaşdırılması istiqamətində yeni layihələrdən danışdı. Mərasimdə çıxış edən AMEA prezidenti, akademik İsa Həbibbəyli, Azərbaycan Respublikası elm və təhsil nazirinin müavini Firudin Qurbanov, Akademik Yusuf Məmmədəliyev Fondunun prezidenti Sevda Məmmədəliyeva Azərbaycan Respublikası Prezidenti İlham Əliyevin akademik Yusif Məmmədəliyevin 120 illik yubileyinin keçirilməsi haqqında sərəncamının əhəmiyyətini vurğuladılar, yubiley çərçivəsində təşkil olunan tədbirlərin alimin elmi irsinin tədqiqi və müasir perspektivlər fonunda yenidən qiymətləndirilməsi üçün yeni imkanlar açıldığını bildirdilər.

Muzeyin elmi işlər üzrə direktor müavini, tarix elmləri doktoru Fərhad Cabbarov 2025-ci ildə Milli Azərbaycan Tarixi Muzeyinin kolleksiyası əsasında nəşr olunan “Yusuf Məmmədəliyev irsi” kataloqu haqqında mərasim iştirakçılarına məlumat verdi. Mərasimin sonunda akademik Yusuf Məmmədəliyevin 120 illik yubileyinin təşkilində və keçirilməsində əməyi olmuş şəxslərə diplomlar təqdim edildi. Təltif olunanlar arasında muzeyin direktoru, akademik Nailə Vəlixanlı da var idi.