XƏBƏRLƏR
XƏBƏRLƏR -
Mühüm hadisələr
16 Mart, 2021
“Anadır arzulara hər zaman Qarabağ!” adlı sərgiyə hazırlıq işləri davam edir

Xəbər verdiyimiz kimi, Milli Azərbaycan Tarixi Muzeyində “Anadır arzulara hər zaman Qarabağ!” adlı sərgi keçiriləcək. Hal-hazırda bunula bağlı sərgidə hazırlıq işləri davam edir.

Qeyd edək ki, sərginin əsas məqsədi 44 günlük Vətən müharibəsini əks etdirməkdir. Bu məqsədlə müharibəyə aid bütün növ eksponatların toplanması işi, eyni zamanda müvafiq informasiya panelləri və stendlərin hazırlanması davam edir. Artıq 73 şəhidə və onlarla qaziyə aid eksponatlar muzeyə təqdim edilmişdir.

Eyni zamanda dövlət təşkilatları tərəfindən də çoxlu sayda eksponatlar təqdim edilmişdir. Onların sırasında Müdafiə Nazirliyi, Dövlət Təhlükəsizlik Xidməti, Dövlət Sərhəd Xidməti, DİN Daxili Qoşunları, Fövqəladə Hallar Nazirliyi, ANAMA tərəfindən təqdim olunmuş eksponatlar xüsusi qeyd olunmalıdır.

Həmçinin sərgidə döyüş əməliyyatları gedən bölgələrdən götürlmüş silah-sursat qalıqları, raket və mərmi fraqmentləri, düşməndən götürülmüş bir sıra qənimətlər nümayiş olunacaq.

Sərginin tərkib hissəsi kimi “Ermənistanın dövlət terrorizmi” adlı fotosərgi hazırlanmaqdadır. Burada altı yerli fotoqraf tərəfindən döyüş bölgələrində və işğaldan azad olunmuş torpaqlarda çəkilmiş fotoşəkillər təqdim olunacaq.

Muzey tərəfindən Vətən müharibəsi ilə bağlı hərbi geyimlər, sənədlər, fotolar, şəxsi əşyaların toplanılması davam etməkdədir.

Tezliklə sərgi tamaşaçıların ixtiyarına veriləcək.