AMEA Milli Azərbaycan Tarixi Muzeyinin Qadınlar Şurası «Vətən müharibəsində  Azərbaycan  qadının rolu» adlı tədbir keçirib. Tədbiri giriş sözü ilə açan Muzeyin Qadınlar Şurasının sədri, t.e.d. Nərgiz Əliyeva Vətən müharibəsi zamanı hər bir Azərbaycan qadınının dövlətimizin başçısının “Biz birlikdə güclüyük” şüarını rəhbər tutaraq Prezidentimizin ətrafında yumruq kimi birləşdiyini, düşmənə həm döyüş meydanında, həm arxa cəbhədə layiqli zərbələr endirərək Zəfər əldə etdiyini qeyd edib.

Hərbi qulluqçularımızla  bərabər  qadınlarımızın da öz üzərinə düşən vəzifələrin öhdəsindən layiqincə gəlməsi xalqımızın qüdrətini bir daha dünyaya nümayiş etdirdiyini  bildirən N.Əliyeva Vətən müharibəsi zamanı qadınlarımızın uğurlu  fəaliyyətlərindən bəhs edib.

Qadınlar Şurasının sədr  müavini  Esmira Rəhimova Qarabağ müharibəsində Azərbaycan qadınlarının iştirakından və rolundan danışıb. I və II Qarabağ müharibəsində yüzlərlə Azərbaycan qadınının öz cəsarətini, mərdliyini, şücaətini sübut etdiyini vurğulayan E.Rəhimova onların səngərdə əsgərlərə ana, bacı, həkim, yarasını sarıyan tibb bacısı, yeri gələndə isə döyüş yoldaşı olduğunu deyib.

Elmi Kütləvi iş və təhsil şöbəsinin elmi işçisi Sahibə Ələkbərovanın hazırladığı məruzə və «Vətən müharibəsində  Azərbaycan  qadının rolu»  adlı  slaydı  maraqla  qarşılanıb.

Tədbir mövzuya aid müzakirələrlə  davam etdirilib.