Bu gün- 18 sentyabr Azərbaycan bəstəkarı, dirijor, pedaqoq, folklorşünas, ictimai xadim, Azərbaycan klassik musiqisinin təsisçilərindən biri Müslüm Maqomayevin doğum günüdür.

AMEA Milli Azərbaycan Tarixi Muzeyinin Hədiyyələr və xatirə əşyaları fondunda görkəmli bəstəkar M.Maqomayevin dirijor çubuğu mühafizə olunur. Çubuğun hər iki ucuna üzərində “M.Maqomayev” yazılmış metal lövhə bərkidilmişdir. Əşya, içərisi bənövşəyi məxmərlə örtülmüş qara qutuya yerləşdirilmişdir. Qutunun üzərindəki metal monoqramda rus dilində “Əziz Muslüm Maqomedoviçə müəllim dostlarından. 31.03.1930-cu il.” yazılmışdır.

M.Maqomayev "Şah İsmayıl" və "Nərgiz" operalarının müəllifidir. "Nərgiz" operası Sovet mövzusunda ilk Azərbaycan operasıdır. O, üç yüzə yaxın Azərbaycan xalq rəqslərinin, mahnılarının və digər melodiyalarının simfonik şərhinin müəllifidir, həmçinin Üzeyir Hacıbəyov və Zülfüqar Hacıbəyov ilə birlikdə bir sıra Azərbaycan xalq mahnılarını nota salaraq işləmişdir.

Qeyd edək ki, muzeyin digər fondlarında da M.Maqomayevə məxsus materiallar yer alır.