Məmmədov Tural Tariyel oğlu 5 noyabr 1999-cu ildə Daşkəsən rayonunda anadan olub. 2000-ci illərdə ailəsi ilə birlikdə Bakıya köçüb. Tural Məmmədov 2006-2015-ci illərdə orta təhsilini Bakı şəhəri M.Rəsulzadə qəsəbəsindəki 99 nömrəli məktəbdə və Mehdiabad qəsəbəsi 1 nömrəli orta məktəbdə aldıqdan sonra 2015-ci ildə Cəmşid Naxçıvanski adına hərbi liseyə daxil olmaqla təhsilini davam etdirib. Səhhəti ilə əlaqədar hərbi məktəbdəki təhsilini yarımçıq qoyub.
2017-2019-cu illərdə həqiqi hərbi xidmətdə olub. Xidmətini ilk olaraq Ağcabədidə, daha sonra Xocavənddə, Harami düzündə yerinə yetirib. Azərbaycan Silahlı Qüvvələrinin Quru Qoşunlarında xidmətdə olarkən vəzifəsi qumbaraatan olub. T.Məmmədov vaxtilə Qərbi Azərbaycanın Göyçə mahalından zorla qovulan göyçəlilərin acı taleyi haqqında hər zaman düşünmüş, düşməndən qisas almağı qarşısına məqsəd qoymuşdur. Müharibə başlamamışdan əvvəl dəfələrlə hərbi xidmətə müraciət etmiş, könüllü qeydiyyatdan keçmişdir.
Tural Məmmədov 2020-cil 28 sentyabr tarixində yenidən hərbi xidmətə çağrılıb. İlk olaraq Gəncədə hərbi təlimlərə qoşulub. Sonra isə Füzuli istiqamətində gedən döyüşlərdə iştirak etmək üçün həmin bölgəyə yola salınıb. Füzulidən başlayan döyüş yolu Şuşadan keçərək Xankəndiyə kimi davam etmişdi. 300 nəfərlik qrupun tərkibində xüsusi təyinatlılarla birgə döyüşüb, döyüşlərdə qumbaraatan olub. Döyüş əməliyyatları zamanı 6 yaralı əsgərimizi təhlükəli ərazidən uzaqlaşdırmağa müvəffəq olub, tank və digər zirehli texnikaları məhv edib.
T.Məmmədov sonuncu dəfə 5 noyabr 2020-ci il tarixində, doğum günündə ailəsi ilə danışıb. Sonralar əlaqə olmadığından ailəsi narahat olmağa, nigaran qalmağa başlayıb. Hətta şəhid olduğu gün anası Turalı yuxusunda görüb.
T.Məmmədov noyabrın 9-da Şuşa döyüşləri zamanı şəhid olub. 12 noyabrda Xırdalanda şəhidlər xiyabanında dəfn edilib. Tural Məmmədov vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin müvafiq sərəncamları ilə “Vətən uğrunda”, “Cəsur döyüşçü”, “Şuşanın azad olunması medalları ilə təltif olunub.
Qeyd edək ki, şəhid Tural Məmmədova məxsus materiallar Milli Azərbaycan Tarixi Muzeyinin Vətən müharibəsi fondunda qorunur.
Təltifləri
(15.12.2020) — "Vətən uğrunda" medalı (ölümündən sonra)
(18.12.2020) — "Cəsur döyüşçü" medalı (ölümündən sonra)
(29.12.2020) — "Şuşanın azad olunmasına görə" medalı (ölümündən sonra)