AMEA Folklor İnstitutu tərəfindən Aşıq Ələsgərin anadan olmasının 200 illik yubileyinə həsr olunmuş “Aşıq sənətinin Ələsgər zirvəsi” adlı beynəlxalq elmi konfrans keçirilib. Konfransda Milli Azərbaycan Tarixi Muzeyinin Azərbaycan tarixinin elmi tədqiqi və təqdimi şöbəsinin əməkdaşı, t.ü.f.d. Əli Fərhadov “Aşıq Ələsgər yaradıcılığında dini və tərbiyəvi motivlər” adlı məruzə ilə çıxış edib. Məruzədə qeyd olunub ki, Aşıq Ələsgərin yaradıcılığı dini maarifçilik, sufizmin tədqiqi baxımından əhəmiyyətlidir. Aşığın əsərlərində əhli-həqq, əli-ilahilik dini fəlsəfəsinin izləri olsa da, Aşıq Ələsgər özünün müsəlman, Qurana tabe bir Əli aşiqi olduğunu göstərmişdir. Həmçinin o, Quranla yanaşı digər dinlərə və onların müqəddəs kitablarına da öz hörmətini bildirmişdir. Məruzədə Prezident İlham Əliyevin Aşıq Ələsgər yaradıcılığının təbliğinə öz töhfəsini, dövlət dəstəyini verməsi də vurğulanmışdır.