Bu gün Azərbaycan Respublikasının Milli Qəhrəmanı, şəhid jurnalist Salatın Əsgərovanın anadan olmasının 60-cı ildönümüdür. 

Salatın Əsgərova 16 dekabr 1961-ci ildə Bakı şəhərində ziyalı ailəsində anadan olmuşdur. 1979-cu ildə Bakı şəhərində Mikayıl Müşfiq adına 18 saylı orta məktəbi bitirmiş, həmin il Azərbaycan Neft və Kimya İnstitutuna daxil olmuşdur.

1991-ci il yanvarın 9-da Laçından Şuşaya yollanarkən Qaladərəsi kəndi yaxınlığında düşmən tərəfindən amansızcasına qətlə yetirilən Salatın Əsgərova Azərbaycanın ilk şəhid qadın jurnalistidir. 

Qeyd edək ki, Milli Azərbaycan Tarixi Muzeyində şəhidlik zirvəsinə ucalaraq Milli Qəhrəman adını qazanan bir çox vətən övladının materialı mühafizə edilir. Onların arasında Salatın Əsgərovanın da xüsusi yeri var.

ABŞ-ın paytaxtı Vaşinqton şəhərindəki News muzeyinin önündə şəhid jurnalistlərin siyahısı olan lövhədə qəhrəman  müxbirlərimiz Salatın Əsgərova və Çingiz Mustafayevin adları çəkilmişdir. Həmin lövhənin təqdim olunan fotoşəkilləri muzeyin Sənədli mənbələr fondunda qorunur.