18 fevral 2022-ci il tarixində Türkiyə Cümhuriyyətinin Quşadası Mədəniyyət və Tarixi Mirasın Qorunması Dərnəyi tərəfindən “Kuşadası Digital Akademi Şubat Ayı Konukları və Konuları” adlı beynəlxalq elmi konfrans keçirilmişdir.

Konfransda AMEA Milli Azərbaycan Tarixi Muzeyinin Arxeologiya Elmi Fond şöbəsinin elmi işçisi,  t.ü.f.d., dosent Həbibə Əliyeva “Azerbaycan Koç Başlı Kabir Taşları (Azərbaycan qoç başlı qəbir daşları)” adlı məruzə ilə onlayn çıxış edib. Məruzə slayd nümayişi ilə iştirakçılara təqdim olunub. H.Əliyeva çıxışında Azərbaycandakı qoç başlı qəbir daşlarının öyrənilməsinin tarixindən, yayılma arealından danışıb.

Daha sonra son illərdə Azərbaycanın müxtəlif ərazilərindəki qoç fiqurlu məzar daşlarının epiqarfik tədqiqatları haqqında geniş məlumat verildi və bu sahədəki problemlər haqqında müzakirələr aparıldı.

H.Əliyeva müzakirələrdə xüsusilə işğaldan azad edilmiş ərazilərimizdə erməni silahlı qüvvələri tərəfindən tamamilə məhv edilmiş və yararsız vəziyyətə salınmış, türk-islam mədəniyyətini əks etdirən məzar daşları və kitabələr haqqında da məlumat verdi.

Sonda iştirakçılar tərəfindən verilən suallar ətraflı cavablandırıldı.