AMEA Milli Azərbaycan Tarixi Muzeyində İnnovasiyalar və təhsil proqramları şöbəsinin təşkilatçılığı ilə Od çərşənbəsinə həsr olunmuş “Yurdumuza Novruz gəlir, yaz gəlir” adlı növbəti ustad dərsi keçirilib. Ustad dərsində Binəqədi rayonu 182 nömrəli tam orta məktəbin şagirdləri iştirak edib.

Od çərşənbəsinə həsr olunmuş dərsdə İnnovasiyalar və təhsil proqramları şöbəsinin əməkdaşı Aynur Babayeva  şagirdlərə Novruz bayramının və çərşənbələrin mahiyyəti, bayramla bağlı adət-ənənələr haqqında məlumat verib.

Sonra şagirdlər yumurta formasında olan gips fiqurlar üzərində rəngləmələr aparıb, kəndir dartma oyunu, Novruz şənliklərinin əsas personajlarından olan Keçəl ilə "yumurta döyüşü" oyunu və Novruz bayramı atributlarını uşaqlara tanıtmaq məqsədilə komandalar şəklində digər oyunlar oynayıblar.

Sonda şagirdlərə hədiyyələr  paylanılıb və H.Z.Tağıyevin ev muzeyinə, "Nizami Gəncəvi və Azərbaycan Atabəyləri dövləti" sərgisinə ekskursiya təşkil olunub.

Ustad dərsi iştirakçıları hazırladıqları nümunələri özləri ilə aparıblar.