Azərbaycan Dillər Universitetində (ADU) Multikulturalizm mərkəzinin təşkilatçılığı ilə "Azərbaycan multikulturalizminin elmi-fəlsəfi və ictimai-publisistik qaynaqları" adlı kitabın təqdimat mərasimi keçirilib. Təqdim olunan kitabda müasir dünyanın multikultural dəyərləri, “Azərbaycançılıq” ideologiyasının formalaşması öz əksini tapır.
Tədbirdə kitabın həmmüəllifi, Milli Azərbaycan Tarixi Muzeyinin Azərbaycan Tarixinin Elmi Tədqiqi və Təqdimi şöbəsinin əməkdaşı, t.ü.f.d. Əli Fərhadov "XIX-XX əsrin əvvəlləri Azərbaycan publisistikasında multikulturalizm və tolerantlıq ideyaları" mövzusunda məruzə ilə çıxış edib. Ə.Fərhadov Azərbaycan mütəfəkkirlərinin, ruhanilərinin yaradıcılığında dini vəhdət və xalqlar dostluğu mövzusundan bəhs edib.
Tədbirdə ADU-nun rektoru, kitabın ideya müəllifi, akademik Kamal Abdulla, Bakı Beynəlxalq Multikulturalizm Mərkəzinin nümayəndələri, AMEA-nın, ADU-nun professor-müəllim heyəti də iştirak ediblər.
