Milli Azərbaycan Tarixi Muzeyinin İnnovasiyalar və təhsil proqramları şöbəsi tərəfindən Azərbaycan Respublikasının Prezidenti İlham Əliyevin Azərbaycan Respublikasında 2022-ci ilin “Şuşa İli” elan edilməsi haqqında Sərəncamına əsasən “Milli Azərbaycan Tarixi Muzeyinin eksponatlarında tarixi-mədəni irsimizin əksi” adlı silsilə layihə çərçivəsində növbəti görüş keçirilib.

S.C.Pişəvəri adına Respublika Humanitar Fənlər Gimnaziyasında fəalliyyət göstərən Respublika Uşaq-Gənclər İnkişaf Mərkəzinin (RUGİM) “Gənc bələdçi” dərnəyinin dəvəti ilə Muzeyin  İnnovasiyalar və təhsil proqramları şöbəsinin əməkdaşları - Qənirə Qafarlı və Kubra Dadaşova tərəfindən liseydə mühazirə təşkil olunub. Q.Qafarlı şagirdlərə "Milli Azərbaycan Tarixi Muzeyinin eksponatlarında tarixi-mədəni irsimizin əksi" mövzusunda mühazirə deyib. Slaydlarla müşayiət olunan mühazirədə Milli Azərbaycan Tarixi Muzeyinin fondlarında qorunan Qarabağın və Şuşa şəhərinin tarixi, mədəniyyəti və etnoqrafiyasını əks etdirən materiallar haqqında, həmçinin muzeyin ekspozisiyası və fondları haqqında ətraflı məlumat verilib. Mühazirə zamanı "Gənc bələdçi" dərnəyinin təşkilatçılığı ilə Qarabağ bölgəsinin XIX əsrin sonlarına aid  olan gümüş kəməri nümayiş olunub. Mühazirə şagirdlər  tərəfindən maraqla qarşılanıb.

Sonda "Gənc bələdçi" dərnəyinin rəhbəri Günel Quliyeva bu kimi tədbirlərin böyük əhəmiyyət kəsb etdiyini və muzey-məktəb əlaqələrinin intensivliyinin vətənpərvər nəslin böyüməsində mühüm rol oynadığını qeyd edərək, muzey əməkdaşlarına öz təşəkkürünü bildirib.