Sağlamlıq imkanları məhdud insanların cəmiyyətə sürətlə inteqrasiya etməsi, mədəni mühitin bir hissəsi olması müasir muzeylərin də əsas hədəflərindəndir. Bu gün Milli Azərbaycan Tarixi Muzeyinin mühüm sosial vəzifələri sırasında digər ziyarətçilərlə bərabər xüsusi qayğıya ehtiyac olan insanlar üçün də bərabər imkanların yaradılması dayanır.  

Milli Azərbaycan Tarixi Muzeyində müqəddəs Ramazan ayının ilk xeyriyyə tədbiri, “Xarıbülbül - Şuşanın simvolu” adlı ustad dərsi keçirilib. İnklüziv muzey prinsipi əsasında keçirilmiş tədbirdə Qayğı-Sağlam Nəsil Naminə İctimai Birliyin nəzdində fəaliyyət göstərən Daun Sindromlu Şəxslərin Reabilitasiya Mərkəzinin üzvləri iştirak edib.  

Tədbir iştirakçılarına Xarıbülbül çiçəyi formasında aksesuar düzəldilmə və rənglənmə qaydası öyrədilib. 

Qeyd edək ki, muzeydə sağlamlıq imkanları məhdud insanlar üçün müxtəlif mövzularda ustad dərslərinin keçirilməsi də nəzərdə tutulmuşdur.