Azərbaycan xalqının böyük şəxsiyyəti, görkəmli yazıçı, həkim və ictimai-siyasi xadim Nəriman Nərimanov 1870-ci il 14 aprel tarixində Tiflis şəhərində anadan olmuşdur. Qori Müəllimlər Seminariyasını bitirmiş və məşhur xeyriyyəçi H.Z.Tağıyevin köməyi ilə tibb təhsili almışdır. Hələ gənc yaşlarında Bakıda kitabxana-qiraətxana açmış və ana dilində məktəblər üçün dərsliklər hazırlamışdır.

Milli Azərbaycan Tarixi Muzeyinin Sənədli mənbələr, Hədiyyələr və xatirə əşyaları və Fotoneqtiv fondlarında  ictimai xadim N.Nərimanova məxsus yazı ləvazimatı, qəzet, jurnal və bir sıra foto materiallar qorunur.  Qeyd edək ki, həmin materiallar arasında Ali Pedaqoji İnstitutunun xəbərləri bölməsində İnstitutun təsisatının 3-cü il dönümünə həsr olunan sayında N.Nərimanovun müəllim və tələbələrə müraciəti (Bakı 1925-ci il), həmçinin N.Nərimanovun Həştərxanın ictimai xadimləri arasında fotosu da yer alır.

Xatırladaq ki, N.Nərimanovun 2020-ci il tarixində 150 illik yubileyinin keçirilməsi haqqında Azərbaycan Respublikasının Prezidenti İlham Əliyevin Sərəncamına müvafiq olaraq bütün ölkədə, o cümlədən Milli Azərbaycan Tarixi Muzeyində də mütəmadi olaraq silsilə tədbirlər keçirilmişdir.