Bu gün, Azərbaycan klassik musiqi mədəniyyətinin parlaq nümayəndəsi, xalq artisti, Dövlət mükafatı laureatı bəstəkar Arif Məlikovun doğum günüdür.

Arif Cahangir oğlu Məlikov 13 sentyabr 1933-cü ildə Bakı şəhərində anadan olub. O, 1960-cı ildə Üzeyir Hacıbəyov adına Azərbaycan Dövlət Konservatoriyasını Qara Qarayevin bəstəkarlıq sinfi üzrə bitirmiş, elə həmin ildən orada dərs deməyə başlamış, ömrünün sonuna kimi orada professor və bəstəkarlıq kafedrasının müdiri vəzifəsində fəaliyyət göstərmişdir.

Simfonik musiqi sənətinin dahi siması Qara Qarayevin layiqli yetirməsi olmuş A.Məlikov yaradıcılığının erkən dönəmində ərsəyə gətirdiyi ilk böyük əsəri “Məhəbbət əfsanəsi” baleti ilə dünyada tanındı. Sonrakı illərdə fitri istedadlı sənət adamı bir neçə baletin və simfonik əsərlərin müəllifi oldu. Onun orijinal dramaturji quruluşa malik olan, özünəməxsus musiqi uslubu ilə seçilən dərin məzmunlu əsərləri Avropa, Asiya, Afrika, Şimali və Cənubi Amerikanın teatr səhnələrində qoyuldu və simfonik salonlarında çalındı.

Milli Azərbaycan Tarixi Muzeyinin Sənədli mənbələr fondunda Arif Məlikova məxsus "Yürüş" əsərinin not yazısı, Fotoneqativ materialları fondunda isə fotoneqativ qorunur. Müəllif "Yürüş" əsərinin üz səhifəsinin alt hissəsində həmin not yazısını Azərbaycan Tarixi Muzeyinə bağışladığını qeyd etmişdir.