Milli Azərbaycan Tarixi Muzeyində 9 noyabr - Dövlət Bayrağı Günü ilə əlaqədar "Zəfər bayrağı" adlı tədbir - ustad dərsi keçirilib. Tədbirdə Qobu rayonu 1 saylı tam orta məktəbin şagirdləri iştirak edib.

Tədbirin keçirilməsində məqsəd dövlət atributlarımızın təbliği, məktəblilər arasında vətənpərvərlik hisslərinin və milli-mənəvi dəyərlərin aşılanmasıdır.

Azərbaycan Respublikasının Dövlət Himninin səsləndirilməsi ilə başlanan tədbirdə muzeyin İnnovasiyalar və Təhsil Proqramları şöbəsinin əməkdaşı Qənirə Qafarlı çıxış edərək, bayrağımızın yaranma tarixi, ona verilən önəm və 9 noyabr tarixinin “Bayraq Günü” kimi qeyd edilməsi haqqında geniş məlumat verib. O, çıxışında  bildirilib ki, ölkə başçısının 2009-cu il 17 noyabr tarixli Sərəncamı ilə təsis edilən Dövlət Bayrağı Günü müqəddəs bayrağımıza, tarixi keçmişimizə, mənəvi-siyasi dəyərlərimizə dövlət səviyyəsində olan diqqət və ehtiramın ən yüksək göstəricisidir.

Sonra muzeyin şöbəsinin əməkdaşları tərəfindən şagirdlərə gips fiquru üzərində bayraq  rənglənməsi və bayraq aplikasiyasının düzəldilmə qaydası öyrədilib.

Sonda Hacı Zeynalabdin Tağıyevin ev muzeyinə ekskursiya təşkil olunub və şagirdlərə muzeyin İnnovasiyalar və Təhsil Proqramları şöbəsinin müdiri Fəridə Şəmsi tərəfindən sertifikatlar təqdim olunub.