Bu gün, 28 noyabr görkəmli mütəfəkkir, maarifçi alim, publisist, təbiətşünas, Azərbaycan milli mətbuatının banisi və ictimai xadim Həsən bəy Zərdabinin anım günüdür.

Bununla əlaqədar, Fizika sahəsində ilk azərbaycanlı mütəxəssislərdən biri, Həsən bəy Zərdabinin qardaşı oğlu Rəhim bəy Məlikovun muzeyin Sənəndli mənbələr fondunda qorunan kolleksiyasından iki fotoşəkli təqdim edirik. XIX əsrin sonlarında çəkilmiş birinci fotoşəkildə kiçik masa ətrafında toplaşmış Məlikov qardaşlarını görmək olar. Solda Həsən bəy Zərdabi, ayaqüstə isə Rəhim bəyin atası Mehrəli bəydir. Digər fotoşəkildə isə fədakar maarifçi Həsən bəy ömrünün son illərində təsvir olunmuşdur. Şəkilin arxa hissəsində Rəhim bəy tərəfindən əmisi Həsən bəy haqqında “Əziz, unudulmaz əmimdən son yadigar” sözləri yazılmışdır.

Bundan əlavə, fondda təsisçisi Həsən bəy Zərdabi olan “Əkinçi” qəzetinin 1877-ci il 1-20-ci saylarının fotosurətlərinin toplusu mühafizə olunur.