Mədəni irsin qorunması, təbliği və  turizm infrastrukturunun inkişaf etdirilməsi ilə əlaqədar Basqal Dövlət Tarix-Mədəniyyət qoruğu və Basqal Qəsəbə Mədəniyyət evinin birgə təşkilatçılığı ilə Basqalda “Muzeylərdə ekskursiya işinin təşkili” adlı təlim keçirilib. Təlimin məqsədi muzey bələdçilərinin nəzəri və praktik biliklərini artırmaqdan ibarət olub.

Təlimdə Basqal Mədəniyyət Evinin, Basqal Dövlət Tarix-Mədəniyyət Qoruğunun, "Beşbarmaq dağı" Dövlət Tarix-Mədəniyyət və Təbiət Qoruğunun, “Diri Baba Türbəsi” memarlıq abidəsinin əməkdaşları ilə yanaşı, Milli Azərbaycan Tarixi Muzeyində fəaliyyət göstərən “Gənc muzeyşünaslar və muzeysevərlər klubu”nun üzvləri də iştirak ediblər.

Təlim muzeyin İnnovasiyalar və təhsil proqramları şöbəsinin elmi işçisi Sahibə Ələkbərova tərəfindən aparılıb. S.Ələkbərova muzeylərdə elmi-kütləvi işin əsas hissəsini təşkil edən ekskursiyanın mövcud nöqsan və çatışmazlıqları, bələdçilərin nəzəri və praktik bilik səviyyəsi barədə iştirakçılara ətraflı məlumat verib.

Təlimin yekununda iştirakçılarla geniş fikir mübadiləsi aparılıb və onları maraqlandıran suallar cavablandırılıb. Sonda iştirakçılara sertifikat təqdim edilib.