16 mart 2023-cü il tarixində Milli Azərbaycan Tarixi Muzeyinin elmi işlər üzrə direktor müavini, tarix elmləri doktoru, dosent Fərhad Cabbarov Elm və Təhsil Nazirliyinin təşkilatçılığı ilə Bakı şəhəri Hacı Zeynalabdin Tağıyev adına 123 nömrəli tam orta məktəbdə keçirilmiş "Novruz mühazirəsi" adlı tədbirdə “Hacı Zeynalabdin Tağıyevin milli miqyası" mövzusunda mühazirə ilə çıxış edib. Fərhad Cabbarov çıxışında məşhur xeyriyyəçi H.Z.Tağıyevi zənginliyə aparan yoldan, milli təhsilimizin inkişafında Tağıyev nümunəsindən danışıb, Tağıyevin qızlar məktəbini onun şah əsəri adlandırıb, həmçinin, məktəbin milli təhsil tariximizdəki rolundan söz açıb. Mühazirə iştirakçılar tərəfindən maraqla dinlənilib.

Tədbir iştirakçıları məktəbin həyətindəki H.Z.Tağıyevin büstünü ziyarət edib, önünə gül dəstələri qoydular. Eyni zamanda məktəbin həyətində dəfn olunmuş iki türk əsgərinin məzarına və məktəbin şəhid məzunlarının xatirə lövhəsinin qarşısına güllər düzülüb.

Sonda tədbir iştirakçıları H.Z.Tağıyevin xatirə muzeyini ziyarət ediblər.