25 may 2023-cü il tarixində Ukraynada “Müharibə və müharibədən sonrakı yenidənqurma şəraitində ərzaq və ətraf mühitin təhlükəsizliyi: Ukrayna və dünya üçün çağırışlar” mövzusunda Beynəlxalq Elmi-Praktik Konfrans keçirilib. Konfransda Azərbaycan, Ukrayna, ABŞ, Böyük Britaniya, Kanada, Polşa, Hindistan, Latviyadan elmi ictimaiyyətin nümayəndələri iştirak ediblər.

Konfransda Milli Azərbaycan Tarixi Muzeyinin Beynəlxalq əlaqələr və ictimaiyyətlə iş şöbəsinin əməkdaşı, t.ü.f.d. Fuad Ağayev “2021-2022-ci illərdə hərbi əməliyyatlardan sonra muzeylərin bərpası: Azərbaycanın təcrübəsi” adlı məruzə ilə çıxış edib (Ukrayna dilində). F.Ağayev məruzəsində 44 günlük Vətən Müharibəsindən sonra işğaldan azad edilmiş ərazilərdə muzey işinin bərpası sahəsində Azərbaycanın təcrübəsini və ölkə prezidenti tərəfindən bu məsələyə göstərilən diqqəti xüsusi vurğulayıb. Məruzə iştirakçılar tərəfindən maraqla qarşılanıb və dərc olunmuş məqalələr toplusunda yer alıb.