Milli Azərbaycan Tarixi Muzeyi Azərbaycanın ərazi bütövlüyü uğrunda canından keçən, şəhidlik zirvəsinə ucalan qəhrəmanlarımıza məxsus materialların toplanmasında, qorunub nümayiş etdirilməsində, təbliğində və gələcək nəsillərə ötürülməsində mühüm missiyanı həyata keçirir.
Hazırda təqdim etdiyimiz, muzeyə yeni daxil olmuş materiallar 2016-cı ildə baş vermiş Aprel döyüşləri şəhidlərinin şəxsi əşyalarıdır. Azərbaycanın Milli Qəhrəmanı, şəhid mayor Samid İmanovun şəxsi əşyaları- hərbi kompası, qan qrupu rezus faktoru nişanı, isimlik, gizir Elimdar Səfərovun hərbi şücaətini əks etdirən “Azərbaycan Respublikası Silahlı Qüvvələrinin 95 illiyi” yubiley medalı və vəsiqəsi Neftçala rayonunda şəhidlərin ailələri tərəfindən muzeyin əməkdaşı Gülnar Fərhadovaya təqdim edilmiş və muzeyin Vətən müharibəsi fonduna təhvil verilmişdir.
Qeyd edək ki, sözügedən eksponatlar muzeyin yeni qurulan ekspozisiyasında nümayiş olunacaq.