Tarixi materiallar toplusu- “Çapar” jurnalının yeni sayında muzeyin elmi işlər üzrə direktor müavini, t.e.d., dosent Fərhad Cabbarovun Azərbaycanın milli mətbuatının böyük nümayəndəsi, tanınmış maarifçi və ictimai xadim Ömər Faiq Nemanzadə haqqında geniş yazısı təqdim olunub. Nəşrdə Ö.F.Nemanzadənin muzeydə qorunan materialları da yer alıb. Tədqiqatçı-alim F.Cabbarov qeyd edib ki, “muzeyə hədiyyə edilən materialların əksəriyyəti Ö.F.Nemanzadənin özünə və ailə üzvlərinə aid fotoşəkillərdir. Bunlar arasında ən “yaşlısı” Ö.F.Nemanzadənin 1870-ci illərin sonu-1880-ci illərin əvvəlində, Ahalsıxda çəkdirdiyi şəkildir”.
Xatırladaq ki, Milli Azərbaycan Tarixi Muzeyi tərəfindən muzeyin kolleksiyası əsasında Ö.F.Nemanzadəyə həsr olunmuş fotoalbom hazırlanmışdır. F.Cabbarovun və Ö.F.Nemanzadənin nəticəsi Ülviyyə Pepinovanın tərtibçisi olduğu fotoalboma böyük maarifçinin varisləri tərəfindən muzeyə hədiyyə olunmuş nadir fotoşəkillər, həmçinin vaxtilə muzey əməkdaşları tərəfindən toplanan digər materiallar daxil edilmişdir.