Azərbaycanın ənənəvi məişətində daxili interyeri təşkil edən bir-birindən fərqli nümunələri nəzərdən keçirdikdə toxuculuqla bərabər tikmə sənətinin də yüksək inkişafının şahidi oluruq. Azərbaycanda güləbətin, təkəlduz, pilək, muncuq və bir sıra digər tikmə növləri mövcud olmuşdur. Onların sırasında pilək tikmə sənəti qədim tarixə malikdir. Milli Azərbyacan Tarixi Muzeyinin zəngin pilək tikmə kolleksiyasından öz bədii tərtibatı və növ etibarilə seçilən qanovuz pərdəni təqdim edirik. Muzeyin Etnoqrafiya fondunda qorunan bu unikal sənət incisi 1883-cu ildə ərsəyə gəlmişdir. Pərdənin mərkəzi hissəsində stilizə edilmiş ağac və kənarlarda pilək tikmə növü üçün xarakterik olan gülabdan təsvirləri verilmişdir. Eksponatın kənar haşiyələri isə fərqli rəngdə piləklərdən ibarət gül naxışları ilə bəzədilmişdir.