Azərbaycan-Qazaxıstan tarixi əlaqələrini birləşdirən numizmatik materillar əsasında kataloqun hazırlanması məqsədilə Qazaxıstan Respublikasının Azərbaycan Respublikasındakı Səfirliyinin əməkdaşı Adilet Sagimbayev Milli Azərbaycan Tarixi Muzeyinin Numizmatika fondunda olub. Muzeyin Numizmatika fondunun əməkdaşları- t.ü.f.d Aygün Məmmədova və həmin fondun baş mütəxəssisi Gülnar İsmayılova tərəfindən fondda qorunan Çingizilər, Cəlairilər, Qızıl Orda, Cuçilər dövrünün sikkələri əyani şəkildə göstərilərək məlumat verilib. Eyni zamanda həmin sikkələrin fondda rəqəmsallaşması və müasir dövrdə təbliği ilə bağlı görülən işlərdən söhbət açılıb. Söhbət zamanı sözügedən kataloqun hazırlanması ilə əlaqədar qonağın sualları ətraflı cavablandırılıb və nümunə olaraq muzeyin numizmatik kolleksiyası əsasında hazırlanmış nəşrlər təqdim olunub. Həmçinin, tədqiqatçı alim A.Məmmədova qeyd edib ki, ekspozisiyada belə sikkələrin nümayişi və təbliği dövrün tarixinin tədqiqində mühüm əhəmiyyət kəsb edir.
