Bu gün “Molla Nəsrəddin” ədəbi məktəbinin banisi və ideya rəhbəri, görkəmli yazıçı, dramaturq, ictimai xadim Cəlil Məmmədquluzadənin anadan olmasından 155 il ötür. Cəlil Məmmədqulu oğlu Məmmədquluzadə 1869-cu il fevral ayının 22-də Naxçıvan şəhərində anadan olub. Əlamətdar günlə bağlı Milli Azərbaycan Tarixi Muzeyinin Fotoneqativ materillar fondunda qorunan fotoneqativi təqdim edirik.

Qeyd edək ki, XX əsrin əvvəllərinə aid həmin fotoda Azərbaycanın görkəmli ictimai-siyasi xadimləri: sağdan sola Qurbanəli Şərifzadə, Ömər Faiq Nemanzadə, Sultan Məcid Qənizadə, Həmzət bəy Qəbulov-Şirvanlı, Cəlil Məmmədquluzadə, Əlisgəndər Cəfərzadə təsvir olunub.

Həmçinin, muzeyin Kitabxanasında qorunan nadir nümunələrindən biri- “Molla Nəsrəddin” jurnalının müxtəlif orijinal nüsxələri saxlanılır. Satirik jurnal müəyyən fasilələrlə 25 il ərzində Tiflisdə, Təbrizdə və Bakıda dərc olunub. Tiflisdə 1906-1918-ci illərdə, Təbrizdə 1921-ci ildə, Bakıda 1922-1931-ci illərdə işıq üzü görüb. Jurnalın ilk nömrəsi 1906-cı il aprelin 7-də Tiflisdə “Qeyrət” mətbəəsində nəşr olunub. Onun redaktoru, görkəmli yazıçı və publisist Cəlil Məmmədquluzadə yazırdı ki, “Molla Nəsrəddin” jurnalını zəmanə özü yaratdı.