Milli Azərbaycan Tarixi Muzeyində Yel çərşənbəsinə həsr olunmuş “Novruz görüşləri ” adlı tədbir-ustad dərsi keçirilib. Tədbirdə Bakı şəhəri 111 nömrəli tam orta məktəbin şagirdləri iştirak edib.

Xalq təqvimi ilə ilaxır çərşənbələrin üçüncüsü - Yel çərşənbəsidir. Xalq arasında yel çərşənbəsinə "Küləkli çərşənbə", "Külək oyadan çərşənbə", "Yelli çərşənbə", "Badi (külək) çərşənbə", "Nəfəs çərşənbə" də deyirlər.

Yel çərşənbəsində gün ərzində küləklər bir neçə dəfə dəyişir ki, bu da onun özünün tənzimlənməsi kimi qəbul edilir.

Tədbirdə İnnovasiyalar və təhsil proqramları şöbəsinin əməkdaşları tərəfindən şagirdlərə gips fiqur üzərində Novruz atributları rənglənməsi və kağız üzərində aplikasiya qurmaq qaydası öyrədilib, face art proqramı keçirilib.

Sonra şagirdlər yumurta formasında olan gips fiqurlar üzərində rəngləmələr aparıb, kəndir dartma oyunu oynayıb, Novruz bayramı atributlarını tanımaq üçün  komandalar şəklində digər oyunlar oynayıblar.

Sonda H.Z.Tağıyevin ev muzeyinə ekskursiya təşkil olunub.