Xalçaçılıq sənəti bədii sənətkarlığın ən məşhur forması və Azərbaycan xalqının milli kimliyinin daşıyıcısıdır. Gündəlik həyatda, müxtəlif mərasimlərdə əvəzedilməz məişət elementi və xalq yaradıcılığının ilhamverici komponenti  olan xalçalar, eyni zamanda xalqın mədəni irs nümunəsidir. 
Milli Azərbaycan Tarixi Muzeyinin zəngin kolleksiyasında müxtəlif süjetli xalçalar mühafizə olunur. Bu nümunələrdən birini, Etnoqrafiya fondunda qorunan, Azərbaycanın görkəmli şairi və mütəfəkkiri Nizami Gəncəvinin “Xosrov və Şirin” poemasından müxtəlif səhnələr  təsvir edilmiş xalçanı təqdim edirik. Xalça Təbriz xalçaçılıq məktəbinə aid edilir.

Qeyd edək ki, Təbriz xalçaçılıq məktəbi “Həddad”, “Göllü-guşəli”, “Bağ-behişt”, “Bağ-meşə”, “Buta”, “Dərviş”, “Kətəbəli”. “Güldanlı”, “Leyli və Məcnun”, “Səhənd”, “Fərhad və Şirin”, “Xətai”, “Ceyranlı” və s. koloritinə, süjetlərin təsvirinə görə seçilən klassik kompozisiyaları ilə məşhurdur. 
Muzey kolleksiyasının zəngin incilərindən olan xalçada Xosrovun Şirinlə ov zamanı görüşmə səhnəsi, çövkən oyunu, musiqi və s. səhnələr, eyni zamanda müxtəlif zoomorf və nəbati təsvirlər əks olunub.
Sözügedən xalça muzeyin yeni ekspozisiyasında nümayiş olunacaq.