Qəbələ Dövlət Tarix-Bədii Qoruğunun ərazisində yerləşən SEBA Qəbələ Arxeoloji Mərkəzində Milli Azərbaycan Tarixi Muzeyi, Yulius Maksimilian adına Würzburg Universiteti, SEBA (Seul-Bakı) Azərbaycan-Koreya Mədəniyyət Mübadiləsi Assosiasiyasının birgə təşkilatçılığı ilə “Arxeoloji abidələrin müasir metodlarla müəyyənləşdirilməsi və tədqiqi” mövzusunda elmi seminar keçirilib.

Seminarı qoruğun direktoru Zahir Kərimov açaraq, tədbirin əhəmiyyətindən danışıb. Daha sonra SEBA Assosiasiyasının şöbə müdiri, t.ü.f.d., dosent İradə M.Nəcəfova çıxış edərək bildirib ki, SEBA-nın ideya və təşkilatçılığı ilə 2005-ci ildən etibarən Azərbaycan arxeoloqların (AMEA) və 2009-cu ildən Koreya arxeoloqların iştirakı ilə Qəbələdə arxeoloji tədqiqatlar aparılır. İ.M.Nəcəfovanın çıxışı “Qəbələ arxeoloji ekspedisiyası (2005-2019, 2023)” mövzusunda tərtib edilmiş slayd-şou nümayişi ilə davam edib.

Sonra Würzburg Universiteti Qədim Yaxın Şərq Arxeologiyası departamentinin professoru, almaniyalı tədqiqatçı Dr. Martin Gruber “Arxeometriya – maddi mədəniyyətin dərisinin altına girmək” mövzunda təqdimat edərək, müasir və ənənəvi metodlar vasitəsilə arxeoloji tapıntıların laborator şəraitdə təhlilindən və əldə edilən dəqiq elmi nəticələrdən bəhs edib.

Sonra Milli Azərbaycan Tarixi Muzeyinin Arxeologiya elmi fond şöbəsinin böyük elmi işçisi, Xəzər və Azərbaycan Dövlət Pedaqoji Universitetlərinin müəllimi, t.ü.f.d. Laçın Mustafayev “Maddi mədəniyyət abidələrinin öyrənilməsi və təbliği” mövzusunda məruzə ilə çıxış edərək, arxeoloji artefaktların tədqiqi, mühafizəsi və təbliğinin əhəmiyyətini tədbir iştirakçılarının diqqətinə çatdırıb. L.Mustafayev çıxışının sonunda Milli Azərbaycan Tarixi Muzeyinin son nəşrlərini – kataloq və kitab-albomları Qoruğa hədiyyə edib.

Məruzələr yekunlaşdıqdan sonra Milli Azərbaycan Tarixi Muzeyinin Arxeologiya elmi fond şöbəsinin müdiri, t.ü.f.d., dosent N.Quluzadə tədbirin əhəmiyyəti, məruzələrdə səslənən elmi məsələlərin aktuallığı ilə bağlı tədbir iştirakçılarına məlumat verib.

Sonda SEBA Assosiasiyasının sifarişi ilə Bakı Media Mərkəzi tərəfindən hazırlanan “Qəbələ – Qafqaz Albaniyasının paytaxtı” adlı sənədli filmi nümayiş olunub. Tədbirin yekununda qonaqlara SEBA Assosiasiyasının dəstəyi ilə akademik Teymur Bünyadovun rəhbərliyi altında hazırlalan “Qəbələ tarixi”, “Qəbələ etnoqrafiyası”, “Qəbələ folkloru” kitablardan ibarət toplu hədiyyə edilib.

Tədbirdən sonra qonaqları Qəbələ Dövlət Tarix-Bədii Qoruğunun ərazisində yerləşən Səlbir, Qala və Antik şəhər ərazilərində arxeoloji qazıntı sahələri ilə tanış etmək üçün ekskursiya təşkil olunub.