Ümumilli lider Heydər Əliyevin 26 mart 1998-ci il tarixli fərmanına əsasən hər il 31 mart azərbaycanlıların soyqırmı günü kimi qeyd olunur. 1918-ci ilin mart-aprel aylarında Bakı şəhərində və Bakı quberniyasının müxtəlif bölgələrində, Şamaxı, Quba, Xaçmaz, Lənkəran, Hacıqabul, Salyan, Zəngəzur, Qarabağ, Naxçıvan və digər ərazilərdə Bakı Soveti və daşnak erməni silahlı dəstələri azərbaycanlılara qarşı soyqırımı törətdilər. Soyqırımı nəticəsində 12 minə yaxın azərbaycanlı qətlə yetirildi və on minlərlə insan itkin düşdü. Faciə zamanı qədim binalar, tarixi abidələr, ziyarətgahlar da dağıdıldı. Törədilmiş hadisələr öz amansızlığına və miqyasına görə Azərbaycan tarixində ən qanlı faciələrdən biri kimi yaddaşlarda qaldı.

Qeyd edək ki, təqdim olunan fotolar Milli Azərbaycan Tarixi Muzeyində 27-31 mart 2024-cü il tarixlərində nümayiş olunan, 31 mart azərbaycanlıların soyqırımının 106-cı ildönümünə həsr olunmuş “1918-ci il soyqırımı hadisələri Belarus əsilli fotoqraf Lev Doşkeviçin gözü ilə” adlı sərgidəndir.