2023-cü il dekabrın 25-də Azərbaycan Respublikasının Prezidenti İlham Əliyevin ölkəmizdə 2024-cü ilin “Yaşıl dünya naminə həmrəylik ili” elan edilməsi haqqında Sərəncamına əsasən Azərbaycanda ətraf mühitin sağlamlaşdırılması, yaşıllıqların bərpası və artırılması, su ehtiyatlarından və dayanıqlı enerji mənbələrindən səmərəli istifadənin təmin edilməsi istiqamətində işlər aparılır.

Milli Azərbaycan Tarixi Muzeyi “Yaşıl dünya naminə həmrəylik ili” çərçivəsində Hacı Zeynalabdin Tağıyev adına 123 saylı tam orta məktəbin həyətində ağacəkmə aksiyası keçirib. Aksiyada muzey əməkdaşları və həmin məktəbin müəllim və şagird kollektivi iştirak edib. Aksiyanın keçirilməsində məqsəd ağac əkməklə ekoloji tarazlığın bərpasına, ətraf mühitin qorunmasına kömək etmək, atmosferi oksigenlə zənginləşdirmək, ictimaiyyətin diqqətini yaşıllıqların qorunmasına yönəltməkdir.

Daha sonra məktəbin direktoru Sevinc Mustafayeva və məktəbin coğrafiya müəlliməsi Gülnarə Əzimova muzey əməkdaşlarını H.Z.Tağıyevin 1894-cü ildə tikdirdiyi Mərdəkan bağçılıq məktəbinin yenidən təmir olunmuş binası və məktəbdə yerləşən Hacı Zeynalabdin Tağıyev muzeyi ilə tanış edib.

Sonra muzeyin İnnovasiyalar və təhsil proqramları şöbəsinin müdiri Fəridə Şəmsi çıxış edərək, ekoloji aksiyaların mütəmadi olaraq təşkili ilə ətraf mühitin mühafizəsinin vacibliyini insanların, xüsusilə, gənc nəslin diqqətinə çatdırıb və onları ekoloji problemlərə qarşı mübarizədə birgə fəaliyyətə səsləyib. O, həmçinin çıxışında qeyd edib ki, bu aksiyadan sonra muzey ilə H.Z.Tağıyev adına 123 nömrəli tam orta məktəb arasında müxtəlif layihələr və tədbirlər keçiriləcək.

Daha sonra muzeyin hədiyyələri məktəbə təqdim olunub, H.Z.Tağıyevin büstü, məktəbin Vətən müharibəsi şəhid məzunlarının abidəsi və H.Z.Tağıyevin məzarı ziyarət olunub.