Milli Azərbaycan Tarixi Muzeyinin unikal eksponatlarla zənginləşdirilmiş yeni ekspozisiyasında açıq dərslərə start verilib. "Uzaq keçmişin izi ilə - Azərbaycanda İbtidai İcma Cəmiyyəti” adlı açıq dərs İnnovasiyalar və təhsil proqramları şöbəsinin baş mütəxəssisi Qənirə Qafarlı tərəfindən muzeyin ekspozisiyasının  “İbtidai icma cəmiyyətlərinin yaranması. Daş dövrü” və “Tunc və erkən dəmir dövrləri” zalında  keçirilib.

Açıq dərsdə Hacı Zeynalabdin Tağıyev adına 123 saylı tam orta məktəbin müəllim heyəti və şagirdləri iştirak edib. Məqsəd məktəbin tədris proqramına uyğun təşkil olunmuş açıq dərsdə şagirdlərin unikal eksponatlarla əyani şəkildə tanış olmasıdır. Dərs zamanı şagirdlərə  muzeyin qədim dövr maddi-mədəni irs nümunələri haqqında məlumat verilib.

Sözügedən açıq dərs şagirdlərin  maraqlı suallarının cavablandırılması ilə yekunlaşıb.