Milli Azərbaycan Tarixi Muzeyində İnnovasiyalar və təhsil proqramları şöbəsinin “Elmi macəralar saatı” layihəsi çərçivəsində Ümummilli Lider Heydər Əliyevin anadan olmasının 101-ci ildönümünə həsr olunmuş mühazirə keçirilib.
Muzeyin elmi katibi, t.ü.f.d., dosent Sevinc Nəsirova Binəqədi Gənclər Evinin üzvlərinə muzeyin ekspozisiyasının dahi şəxsiyyət Heydər Əliyevə həsr olunmuş zalında mühazirə deyib. Mühazirə zamanı Heydər Əliyevin çoxşaxəli fəaliyyətindən, milli maraqlara əsaslanaraq tarixi proseslərə təsir edən müdrik siyasətindən bəhs edilib. Tələbələr mövzuya uyğun eksponatlarla əyani tanış olub və verilən suallar ətraflı cavablandırılıb.
Qeyd edək ki, 2021-ci ildən muzeydə “Elmi macəralar saatı” layihəsi çərçivəsində bir sıra tədbirlər həyata keçirilir. Layihənin məqsədi şagirdlərin və tələbələrin mədəni asudə vaxtının səmərəli təşkili, eyni zamanda onları fəal yaradıcılığa, tədqiqat işinə, axtarışlara yönəltməkdir.
