Bəşəriyyət üçün dəhşətli, faciəli fəlakətlər dövrü kimi yadda qalan İkinci Dünya müharibəsində Azərbaycan xalqı həm ön, həm də arxa cəbhədə böyük qəhrəmanlıq və şücaət nümunələri göstərib. Qısa müddətdə respublikada 87 qırıcı batalyon, 1124 özünümüdafiə dəstəsi yaradılıb. 1941–1945-ci illərdə Azərbaycanın 600 mindən çox igid oğlu və qızı cəbhəyə yollanıb.

Əlamətdar günlə bağlı Milli Azərbaycan Tarixi Muzeyinin yeni açılan ekspozisiyasında İkinci Dünya Müharibəsi dövrünü əks etdirən eksponatları təqdim edirik. Nümunələr arasında Sovet İttifaqı Qəhrəmanları- Həzi Aslanov, Mehdi Hüseynzadə, Ziya Bünyadov, Adil Quliyev, İsrafil Məmmədov, Züleyxa Seyidməmmədova və başqalarına məxsus silah, medal, məktub və şəxsi əşyalar, o cümlədən həmin dövrdə Azərbaycanın təşkil olunmuş 416-cı, 223-cü milli atıcı diviziyalarının bayraqları, azərbaycanlı döyüşçülərə aid medal, orden, döş nişanları, silah və hərbi geyim nümunələri yer alır.